Ils Fränzlis da Tschlin – musica dal muond chi deriva da l’Engiadina
«Ils Fränzlis da Tschlin», quai sun Domenic, Anna Staschia, Cristina, Madlaina e Curdin Janett cun clarinetta, gïa, cello, viola da bratsch e gïun. Cumanzà haja cun musica populara tradiziunala engiadinaisa ed uossa girunan ils tschinch musicants cun paschiun e paschair tras tuot ils stils da musica pussibels ed impussibels; minchatant bod «kitsch» e lura as ris-chna da’s metter a traviers in stils «privlus».
Lur bun exaimpel es il violinist orb d’Engiadina Bassa, Franz-Josef «Fränzli» Waser (1858-1895). Sunond giraiva’l cun seis frars e pluoders sü e giò per l’Engiadina. Cun sa gïa sunaiva’l be güst quai chi til plaschaiva e quai cha’l publicum laiva tadlar. Là, ingio cha el e seis musicants rivaivan gniva ballà fin la bunura. I vain eir quintà dad üna o tschella s-charplinada in ustarias (o es quai be inventà?- vair istorgia).
Pensond a «l’oriund Fränzli» dal 19avel tschientiner e cun cheus plain ideas nouvas giran uossa ils «Fränzlis» dal 21avel tschientiner per tuot la Svizra intuorn ed eir i’l exteriur. Els sunan musica dal muond cun fermas ragischs engiadinaisas. Fich greiv esa da definar lur «Fränzlisound» special. In mincha cas, i tuna bain, malgrà tuot las definiziuns. Anzi, id es saker bun, sco chi’s disch in Engiadina Bassa.