Ils Fränzlis da Tschlin

Domenic Janett (clarinetta)

vaiva il prüm imprais falegnam e füss cun quai sgür eir stat cuntaint sch’el nu vess dudi pro la musica da recruts chi detta umans chi sun musicants da manster. Da là davent nun es el plü stat da tgnair. Davo ils examens al conservatori a Turich suna e cumponischa „il barbus“ tuot quai chi’d es pussibel. Sperapro instruischa’l a  la scoula da musica e tanteraint chatta’l amo temp per la chatscha. I po perfin capitar cha ün’o tschella cumposiziun nascha dürant il temp da chatscha.

Domenic Janett (clarinetta)

Anna Staschia Janett (gïa)

es sfuondrada davo la matura a Samedan giò aint illa tschiera a Fribourg per stübgiar medicina. Per tgnair las valuors da vitamin D illa balantscha vegn’la adüna darcheu sü sur la tschiera a sunar la gïa o a far practicums da medicina (da princip be  sur 1000m.s.m.). Aint illa gruppa dals Fränzlis batta Anna Staschia plüs records: las plü lungas chommas, ils plü lungs chavels, la plü ota vusch (be sco nöa fin sül h ot) ed insoma la prüma violinista dals Fränzlis.

Anna Staschia Janett (gïa)

Cristina Janett (cello)

s’ha dedichada subit davo la matura a la musica, sainza imprender ouravant alch inandret. Il stüdi da cello a Bern e Turich ha’la fini cul «Master of Arts in Music/Pedagogy and Performance», ün titel simpel per tgnair bain adimmaint. Uossa es ella magistra da cello a Weinfelden e vain ingaschada süls palcs  da quist muond. Ella nu suna be musica populara, mo eir musica classica seriusa, cun «Vibrato» «Allegretto» e daquai! Tuot quai, per cha’l stüdi fich char nu saja stat per nöa e per chi nu’s possa far l’imbüttamaint dad avair sguazzà raps dad impostas.

Cristina Janett (cello)

Madlaina Janett (viola)

vess fat jent ün stüdi da «cuntratemp per viola». Ninglur nun es quai pussibel da far.  Perquai s’ha’la dedichada a seis talents da s-chaffir e fuormar. Ella ha stübgià  a Luzern ed a Turich «Visuelle Kommunikation» e «art education-ausstellen & vermitteln». Che cha quai voul precis dir nu sa ella svess na. In mincha cas guadogn’la seis pan illas spartas crear, fuormar, intermediar l’art e sco schef-experta dad «Off-Beat». Lapro s’ha’la accquistada differentas tecnicas da barschunar sülla viola. Daspö alch temp ha ella l’onur da moderar ils concerts dals Fränzlis, quai chi tilla güda enorm da surmuntar sia tmüchezza innata.

Madlaina Janett (viola)

Curdin Janett (gïun)

Our da motivs incuntschaints ha el davo la matura schaschinà tras il stüdi dad indschegner da maschinas a l’ETH. Ün di davo avair survgni il diplom, ha’l cumanzà il stüdi da musica al conservatori a Winterthur. El es ün multiinstrumentalist fich dumandà (gïun, orgel da man, clavazin e.o.) ed es da chasa i’ls differents stils (musica populara, jazz, latin, chanson e.o.). Seis duns tecnics as manifesteschan be dinrar, per exaimpel cur ch’el declera a seis scolars da musica quant interessant cha ün clavazin es fabrichà o co cha quai funcziuna cul ajer e’l fol in ün orgel da man.

Curdin Janett (gïun)
nach oben